米線王餐廳

之前見到呢間野開張，唸住搵日試下。記得我之前行過，決定下次都係唔會黎。但今日......
落雨天，同事話食米線試下新開呢間，我話上次我睇過，但唔記得咩原因我唔會選擇黎呢度食，結果比次機會佢啦。
去到都有8、9成入座率，座位唔會太迫，但睇睇個menu，嘩，想走囉。
26蚊個湯連配料，7蚊一個餸，即係一餸落樓33蚊，同區價黎講﹐除非你碗野超好味，否則絕對唔值。
同事點了雞絲蕃茄湯底 : 7蚊一個餸，唔會太差吧?! 噢，點知出黎係鞋 及"un"的手絲雞，似係煲完湯用啲渣絲開咁。雖然係咁既quality，但都係比左一小撮。湯底ok，有幾舊蕃茄，但未到超濃湯，所以，個湯唔值廿六，個餸更加唔值7蚊囉!!!!!!
我點了豬軟骨麻辣米線 : 有麻辣味，但唔令我上癮，比言覃人子或巴蜀豬排黎講，比下去。配料亦好求其，兩粒花生，同蔥絲，同酸菜芽菜，但都係少量。都係果句，唔值26蚊。豬軟骨有幾舊，但都係薄切，不過比我同事好囉。唔敢話佢值唔值7蚊，但肯定唔係抵食囉。
埋單一人三十三，一餸米線，都講下個米線啦。無咬口，係煮唔夠會爽，煮得耐會腍果種，我今次係腍，無米線的彈牙口感，都係差。
提一提，佢有個8餸套餐，有貢丸，生菜，雞肉紅腸，魚旦，雞排，腐竹，同唔知咩，呢啲餸，佢收59蚊囉，仲要飲品另計，死未。
佢場細細，伙記好幾個，舖租又應該唔平，所以佢唔收呢個價點做?! 但係...唔係呢個quality囉。