得寶軒偉師傅私房菜

Open Now

Now Closed

呢間私房菜好近灣仔地鐵站同電車站，系一間樓上鋪。今次午餐時間過嚟，午市套餐真係好抵食，八十幾蚊有即整小菜、燉湯同飯，吸引唔少打工仔嚟幫襯，我就係其中之一🤣。❤️涼果雪梨燉川貝呢一盅燉湯真係好驚豔，加咗雪梨片同新鮮無花果，有天然嘅清甜味道。瘦肉唔柴，仲加咗少少南北杏吊味， 真係好好飲，午市套餐價淨系飲呢盅湯都抵。我仲專登留返少少食完嘢再飲，作為一餐美好嘅開始同結尾。❤️脆皮黑豚肉外層少少拔絲口感，脆脆地、酸酸甜甜好開胃，撈飯一流。豬肉肥瘦、軟硬度適中。有新鮮菠蘿，清甜多汁，解膩。❤️富貴蜆中求呢個係餐廳嘅招牌菜，無喺午市套餐入面，見到隔離兩枱都有點，所以嗌嚟試一試。賣相真係好靚，一睇就知系功夫菜式。 蜆殼入面除咗有蜆肉之外仲釀咗蝦膠，令到粒粒蜆都好飽滿，好似打邊爐卜卜蜆咁大粒。成道菜醬油唔多，可以突出餡料嘅鮮味。❤️金瓜蒸黑豚肉黑豚肉餅份量好多，有肉汁同彈性，上面仲放咗好多白飯魚仔，一上菜就聞到鮮香味。南瓜蒸得啱啱好，夠曬軟腍腍但又唔會爛。南瓜、魚仔同埋黑豚肉餅口感都唔一樣，一齊入口層次豐富。另外，餐廳仲有一啲獨立包廂，大房可以坐兩三圍，中房仲有得唱k，幾啱朋友同事聚會。