今次我同個朋友就各叫左個套餐，分別係溫野菜唐揚雞栗子飯（$138）同埋鰻魚壽司飯（$148），隨餐仲會附送一杯鍚蘭紅茶同埋一件細蛋卷，可以揀芝麻/抹茶/雲呢拿味道，而我地2個都揀左抹茶味！
鰻魚壽司飯，面頭唔係一件大既鰻魚，而係切好左既鰻魚，數量都唔少！
而飯入面就有蛋絲同埋青瓜絲俾我地撈埋個飯一齊食，味道甜甜地，唔錯！
溫野菜唐揚雞栗子飯，唐揚雞方面係即叫即炸，上到枱個陣都仲係好熱同埋好脆，而且就算食到最尾有d凍左都好，舊雞都唔會話林啤啤，而且舊炸雞都尚算鮮嫩多汁，唔會話炸到乾晒
，至於個栗子飯，就令我略感失望，栗子只有面頭2個半粒，夾埋都只係一粒栗子，下面既飯同栗子完全冇關係，只係白飯，而栗子偏乾，好彩有個鰹魚湯，令到成個餐冇咁乾！隨餐附送既小菜，入面有蒟蒻粒、紅蘿蔔、秋葵......既蔬菜，味道甜甜地，好開胃！鰹魚湯就偏鹹，但因為飯、雞都唔算鹹，所以配合一齊既時候都唔錯！
跟餐跟左杯錫蘭紅茶，飲完之後，個職員好好咁行過黎問使唔使加水，但因為個人麻麻地茶，所以就冇加到，而朋友就好鍾意啦，因為可以飲多杯！
1
至於跟餐既細蛋捲，份量唔大，4-5口就食完，味道會有少少抹茶既苦澀味，成個甜品都唔算太甜，朋友大推，但我就偏向甜少少既甜品，所以下次可能會叫其他味道試下！
雖然張單寫左用餐時間90分鐘，但可能因為唔full, 而且冇人等位，所以坐超過左時間都冇黎吹我地走！開心！所以如果大家都想搵個可以坐耐少少既地方，見晚市唔多人，呢個都係個好選擇！
