Tsukemen Mitaseimenjo (Soundwill Plaza II - Midtown)

好鍾意食沾麵嘅我一直都係三田嘅忠粉，仲記得當年香港店第一日開業排咗成個鐘先有得食。雖然而家想食拉麵有好多選擇，但三田多年來水準穩定，所以久唔久都會去食。

濃厚豚骨魚介沾麵

最愛佢招牌濃厚豚骨魚介沾麵，次次都係食佢。而且麵有得揀size，大盛都唔使加錢，有成足足450g咁多，一定食得飽（圖中前面係中350g，後面係大450g）

湯底用豬骨、雞骨同大量蔬菜熬煮12小時，再加入特製魚介高湯造出濃厚湯底。湯底夠濃郁但唔會太鹹，加埋魚介粉令魚乾鮮味更突出

自家製粗麵條口感煙韌もちもち，就咁食帶微微小麥香，掛湯效果出色
叉燒唔係用腩肉比較瘦，怕肥嘅我食得開心味道清淡蘸沾汁食就啱晒

自家製唐揚炸雞

除咗原味沾麵，炸雞都係必食！自家製唐揚炸雞單點一份有五件，新鮮炸起表面酥脆，內裡多汁

總括嚟講食物質素高，份量多而且價錢抵食。餐廳環境企理乾淨，座位唔會太逼坐得舒服。