終於搵到我心目中嘅好味薯條了！！
同朋友夜晚約喺深水埗食飯，想靜靜哋傾吓計，於是搵咗呢間試。本身對酒吧餐廳嘅食物無太大期望，點知食落有驚喜！🥰
炸啤酒魚柳薯條
薯條出色！香脆得嚟唔膩，佢唔係M字頭快餐店薯條嘅質地，呢隻薯條偏幼皮薄，調味啱啱好，加上兩大塊新鮮熱辣炸起嘅炸魚，一人一件唔洗爭。
焗肉醬芝士大蘑菇
不得不提呢個焗大蘑菇，厚肉又多汁，芝士肉醬焗好香，我哋兩個好似切pizza咁切嚟食。大蘑菇超級Juicy ，個人覺得呢個釀蘑菇值得嗌。
脆皮德國咸豬手
份量好大，啱share。而家有優惠，嗌豬手就送兩杯醉檸茶。第一次飲醉檸檬茶，概念幾有趣，檸茶飲落淡淡酒味，微醺嘅感覺大家鍾唔鍾意呢？我同朋友就都幾鍾意，因為唔會咁快醉。🤣 最抵係佢個happy hour優惠，星期日至四 （4pm-8pm）如果Follow 餐廳社交平台指定食物有5折！可惜我返工嘅地方太遠了🥲
餐廳嘅環境比較暗，傾心事一流，呢晚同好朋友一邊飲，一邊食都幾開心。平時好少夜晚嚟深水埗食飯，估唔到九江街有呢個地方，都幾特別。
