3
今晚食小寶套餐，平日7:30前離座價錢$228加一，一共可食兩個鐘頭。
四格錦綉前菜，分別有東風螺4隻，雞翼尖，雲耳仔同花生腰果，除左花生腰果，全部都辣辣地，開開胃。
主菜6選1，一次性，包括椰子雞，藤椒烤魚，香辣烤魚，枝竹黑山羊腩煲，老壇酸菜魚，重慶鷄煲。
椰子雞個湯底帶淡淡雞味同椰子味，好夠味又清，用黎打邊爐d野食都夠味，唔洗另外再加醬油。半隻雞切件連雞頭另上，特別係雞腿肉好嫰滑。湯底有唔少椰子片，食落脆口又有椰子味。
另外配有青檸同薑蓉。
食完主菜就轉湯底。湯底6選1，有鴨血麻辣，花膠美人，肉骨茶，澳門豬骨，胡椒豬肚同海皇海鮮。
我地今次選左花膠美人鍋，花膠美人鍋有8件魚肚，仲有紅棗同杞子。個湯雞味濃，鹹度足夠不過好清，個湯底淥野食都夠味，都係唔洗另外再加醬油，更加可以食到食物既鮮味。
以下食物都係用QR code落單。
安格斯極佳級精修肥牛
安格斯極佳級精修肥牛果然係肥牛，脂肪超多。一客兩大片。
安格斯牛板腱
安格斯牛板腱係長方型切割，大部分係一客三片。質感非常厚身有口感。
安格斯牛板翼
安格斯牛板翼都係長形切割，油花稍稍靚少少。一客兩大片，食落同安格斯牛板腱味道質感都差唔多，都好食。
伊比利亞黑毛豬
伊比利亞黑毛豬一客4片，中間肥膏稍微集中，豬味極濃，食落非常嫩口而帶少少彈牙。
伊比利亞黑毛豬豬肋條
伊比利亞黑毛豬豬肋條係新野，一客兩條，半肥瘦，食落好脆口。
紐西蘭羊肉片
紐西蘭羊肉片係圓形切割，一客兩大片，口感好厚身，味道只有少少羶。
鮮脆鯇魚肉
鮮脆鯇魚肉一客多片，真係又脆又鮮。
其他選擇仲有鮮脆鯇骨腩，鮮雞件同雞子。
自助配料吧好集中，衞生都唔錯，全部用蓋蓋住或者放雪櫃。 今餐忙住食用QR code落單既肉，自助配料吧既菜同丸類都無乜攞已經好夠食，唔洗行黎行去。
印象中青菜有娃娃菜，生菜，西洋菜，白菜同菜心等等，
其他蔬菜仲有淮山，萵苣，冬菇，金菇，冬瓜，秀珍菇，木耳，蓮藕，響鈴等。
呢度連炸魚皮都有，香脆好味。
醬料自己去自助醬料吧攞。
飲品有好多款，我最鍾意清甜既自家制竹蔗茅根。
總括而言，食物質素保持一貫水準，特別鍾意呢度既肉類，口感味道都好好！
