潮人私房菜 (Closed)

私房菜食得多，海鮮私房菜就應該第一次啦。一大班老友搵左呢間，三百五十全包。先黎避風塘鮑魚，鮑魚鋪滿晒蒜粒同辣椒，鮑魚肉相當彈牙，而且趙落都滑滑地，加上避風塘煮法，味道惹味之外就令人胃口大開。跟手黎荷葉蒸飯，係用海蝦鋪面，伴上蒜蓉去蒸，白白既蝦肉彈牙帶點膏，膏味同蒜蓉味既混合，呢種濃厚既煮法，襯以荷葉香既白飯，係非常有對比但係超夾煮法，我個人食左3碗飯呀。蒜蓉真係唔停得，蒜蓉蒸扇貝，味道非常香，扇貝香滑而多汁，口感夠滑而厚肉，粉絲正好吸收左扇貝精華，蒜蓉與蔥花味道惹味，係無得輸既菜式。海鮮仲有雲耳蒸桂花魚，廚師細心地幫我們起肉，魚肉相當滑溜，魚汁與雲耳份外夾，用料絕對正確。最後食碟菜係金華火腿津白，津白細細條，口感爽甜，金華火腿香濃，將幾條津白夾住一塊火腿食就更惹味了。