Read full review
2020-11-17
1642 views
由八點半開始上堂上到六點半之後再去補習，感覺好攰，覺得要食返啲好野獎勵自己。所以今次就去左呢間小漁港到食海鮮蒸鍋啦。原因係因為見到佢門口有水缸，入面有好多仲生猛郁緊嘅海鮮，咁我諗呢到啲海鮮應該好新鮮啦掛。黎呢到叫個廚師是日精選套餐係基本啦，$298一位不過包左勁多野食。另外因為好鍾意食魷魚，所以又加左份避風塘鮮魷。而我同朋友嘅食量都幾大，所以又特登加多個南瓜排骨粥底。不過最後發現其實個精選套餐已經好夠食，我地叫左咁多野係食到飽到上心口。🍣象拔蚌刺身拼盤頭盤先嚟一個刺身拼盤，拼盤有四片象拔蚌，而赤蝦、元貝、海膽、吞拿魚就各兩片，兩個人嚟講，呢個頭盤相當滿足，鮮甜嘅海鮮係呢一餐美好嘅開始。🦑避風塘鮮魷呢個係額外叫嘅，避風塘以炸蒜同辣椒炒成，味道都幾辣，非常惹味，啱晒鍾意食辣嘢嘅我，用嚟開胃亦係一流。魷魚方面，炸皮唔算太厚，魷魚就好厚肉，可以一路食住魷魚，一路等啲海鮮蒸熟。🦪鮑魚鮑魚有兩隻，未蒸之前我仲見到啲鮑魚郁下郁下，非常新鮮，鮑魚都差唔多有我半隻手掌咁大。鮑魚咬落好鮮甜，好有咬口，鍾意食海鮮嘅朋友一定要嚟試吓。🐚元貝元貝有兩隻，好大隻，上面應好多炒粉絲，同元貝本身好夾。同出面食嘅蒸元貝
黎呢到叫個廚師是日精選套餐係基本啦，$298一位不過包左勁多野食。另外因為好鍾意食魷魚，所以又加左份避風塘鮮魷。而我同朋友嘅食量都幾大，所以又特登加多個南瓜排骨粥底。不過最後發現其實個精選套餐已經好夠食，我地叫左咁多野係食到飽到上心口。
🍣象拔蚌刺身拼盤
頭盤先嚟一個刺身拼盤，拼盤有四片象拔蚌，而赤蝦、元貝、海膽、吞拿魚就各兩片，兩個人嚟講，呢個頭盤相當滿足，鮮甜嘅海鮮係呢一餐美好嘅開始。
🦑避風塘鮮魷
呢個係額外叫嘅，避風塘以炸蒜同辣椒炒成，味道都幾辣，非常惹味，啱晒鍾意食辣嘢嘅我，用嚟開胃亦係一流。魷魚方面，炸皮唔算太厚，魷魚就好厚肉，可以一路食住魷魚，一路等啲海鮮蒸熟。
避風塘鮮魷
$68
31 views
0 likes
0 comments
🦪鮑魚
鮑魚有兩隻，未蒸之前我仲見到啲鮑魚郁下郁下，非常新鮮，鮑魚都差唔多有我半隻手掌咁大。鮑魚咬落好鮮甜，好有咬口，鍾意食海鮮嘅朋友一定要嚟試吓。
🐚元貝
元貝有兩隻，好大隻，上面應好多炒粉絲，同元貝本身好夾。同出面食嘅蒸元貝唔同，佢冇落好多蒜蓉，只係作出少量嘅調味，所以保留翻元貝自身鮮甜嘅味道，絕對冇浪費到元貝嘅鮮味。
🐟海魚
海魚有兩塊，雖然唔知係咩魚，但海魚真係好好味。老闆好貼心，一早已經幫我哋將條魚去骨，等我哋食得舒服啲。魚肉好彈牙，一食就知係海魚，加埋魚皮上嘅脂肪，口感層次好豐富。
🦐海蝦
海蝦有兩隻，好大隻。蝦好甜，原來蒸出嚟嘅蝦更容易試到蝦嘅新鮮。
🐚貝殼三寶
貝殼三寶有生蠔、青口、沙白，各兩隻，樣樣都好大隻，蒸完之後貝殼三寶都出咗好多肉汁，之後用嚟撈粥食，真係一流。
🦐瀨尿蝦
瀨尿蝦有兩隻，每隻都有我隻前臂咁長，肉身上面仲有好多膏，蝦肉係非常鮮甜，非常彈牙。一直以黎食瀨尿蝦通常都係椒鹽多，第一次食清蒸。原來清蒸都可以咁好食。我本身食瀨尿蝦通常都係就咁剝曬啲殼食，但多得老闆教導，只要喺蝦背中間剪開佢，再搣走啲蝦殼，就可以保留完整嘅肉，今次真係長知識了。
🦀蟹
蟹有一隻，每人半隻，雖然蟹唔係話好大隻，但佢勝在好多肉同埋啲肉好甜好有蟹味。蒸出嚟嘅蟹汁會流入啲粥入面，最後食粥就可以食翻蟹嘅精華。
🥕農家四寶
農家四寶有番薯仔、南瓜、粟米、芋頭。食咗咁多海鮮，食翻啲蔬菜類清一清，呢個安排幾好。
🐔蟲草花蒸雞烏冬
第一次食蒸嘅烏冬，烏冬、蟲草花、雞一齊喺一塊荷葉上面蒸，最後嘅烏冬會吸收所有雞嘅味道，呢個好正，我好鍾意。
🍚南瓜排骨粥
白米、南瓜、排骨同瑤柱由一開始就已經放咗喺底度，本身放入去嘅時候係冇任何水分嘅，但每樣食物蒸後嘅精華都會流落粥到，個粥可以算係集齊所有海鮮同雞嘅精華而成，味道非常豐富。粥入面仲有瑤柱，用料十足，排骨同南瓜嘅味道配搭非常之合適，用粥做結尾，十分滿足。最後我地係太飽然後食唔曬，打包埋淨低嘅粥返屋企食。
南瓜排骨粥
$78
12 views
0 likes
0 comments
總括而言，今次啲海鮮全部都係就咁蒸熟，又唔洗落額外嘅調味，真係一定要食材本身嘅質素高先會好食。而我覺得呢到嘅海鮮係好食又新鮮嘅。
另外我覺得咁樣逐盤逐盤蒸熟係一個好聰明嘅做法，因為每樣海鮮煮熟需要嘅時間唔同，分開逐盤逐盤蒸就可以避免有啲海鮮過熟，可以確保每樣海鮮都係蒸得啱啱好。同埋佢嘅次序都係有精心安排嘅，例如蒸蟹嘅時間要比較耐，就會喺我地食緊瀨尿蝦嗰陣蒸蟹，因為食瀨尿蝦所需嘅時間同蒸蟹所需嘅時間差唔多，食完瀨尿蝦就有得食蟹，時間啱啱好。
順便一提，老闆真係幾好人，會間唔中走過黎教下我地點樣剝殼會方便啲同好食啲，同我由細到大剝殼嘅方法唔同，真係學到野！
Post
