S2 鐵板燒 (Closed)

佐敦呢個舊區真係越來越多好嘢食，繼上次食完燒肉自助餐之後，我哋今次再戰佐敦區。喺網上見到有鐵板燒餐廳用海膽菜式來做主打，我地即刻流晒口水想去試。鐵板燒師傅樂師傅曾經任職高級日本鐵板燒餐廳，廚藝有保証。餐廳好細，食鐵板燒最好嘅位就係坐吧枱，可惜我哋太遲book位，只好坐普通枱。我哋order左海膽焗原隻龍蝦北海道帆立貝海鮮套餐，侍應提醒我哋，如果想試多啲其他嘢，係可以叫一個set share再加其他散叫。我哋一心呢度就係想試佢個18層海膽杯，淨係聽到個名已經流晒口水，佢18層各有不同口感，至於包括乜嘢，你哋自己睇相，呢個係必食。另外我哋亦都order咗海膽花膠，從來冇諗過兩樣野可以咁夾，不過如果花膠可以再林啲，感覺更加好。至於我哋個餐，包括咗鐵板海膽芝士焗原隻龍蝦，北海道黑松露帆立貝，鐵板燒鰻魚，特別一提嘅係紙包蜆湯，上枱嘅時候侍應會剪開個紙包，好特別。總括來講，以呢個價錢食到呢個質素嘅鐵板燒值得一讚。