餐廳細細間，一共十張枱，是日全場滿座。食物櫃分佈喺唔同角落，唔洗同人爭。一入到去就聞到好香烤蝦殼味，攪到我口水直流。
任飲任食2.5小時，平日晚市黃金時段6到10點，成人每位$279再75折，另加一。仲送海鮮船同美國Prime級牛肉。
叫得流水蝦，究竟係點玩法？原來係自己可以係魚缸度即夾即燒生猛大頭蝦。果然每個位隔離都係水缸，有大頭蝦喺度郁，自己用夾夾啲蝦上黎，服務員提示先放喺冰上面整暈佢，之後先燒，如果唔係佢會喺個爐上面彈出黎。又幾好玩喎！雖然啲大頭蝦細細隻，但係質感好好，仲有蝦籽食，連香脆蝦殼一齊食都得，我唔洗點醬食。
首先服務員放低椒鹽蝦11隻喺個爐上面，雖然調左味，食落同新鮮蝦都冇乜分別。
海鮮船賣相幾靚，有以下海鮮：
扇貝兩隻：好鮮甜，又唔太韌，配蒜蓉好味鮑魚兩隻：非常鮮甜爽口大蜆兩隻同細蜆11隻：超鮮甜同嫩滑白鱔三塊：雖然細細塊，不過又彈牙又多汁，好味
美國Prime級牛肉有：
牛7塊:：算嫩，兩塊圓嘅牛特別嫩口
牛粒7粒：好多肥膏，肉汁豐富，不過要咬
除左以上食物，自助雪櫃有海鮮同肉類俾你自己夾，包括：
青口：都幾新鮮又唔韌蜆：質素同海鮮船嘅差唔多，我哋主攻呢款海鮮肥牛：牛味濃又唔算韌豬肉：豬味濃又脆脆哋
魷魚，秋刀魚，鯖魚，墨魚仔，章魚，豬肋骨，雞肉，唔同調味嘅雞翼，串燒，蟹柳，唔同種類嘅丸類，腸仔等
當然都有蔬菜，包括娃娃菜，金菇，雞脾菇，啡菇，茄子，翠玉瓜，秋葵，粟米，蔥，金菇肥牛卷，另外仲有麵包，菠蘿。
自助炸物有六款：
蝦片：好香脆魷魚圈：仲有少少脆，炸皮又唔過厚，可以餃子雞塊春卷炸雞
自助熱食有三款，包括
芝士焗西蘭花：可以嘅，唔洗燒就簡單有菜食，方便大頭蝦炒麵：啲蝦就凍左湯：唔知係乜湯
沙律有獨立兜裝水果沙律同兩大兜沙律菜，隔離有提子乾。
自助甜品原來有好多款：
馬卡龍：至少見到五款口味，包括士多啤梨，綠茶，雲呢拿，朱古力同檸檬，質素好好，外脆內煙韌，唔算太甜，層果沾都幾厚，喜出望外日式和菓子：有兩款，都有豆沙餡，煙煙韌韌，都可以喎
泡芙：入面啲忌廉好滑，外皮都可以朱古力手指泡芙朱古力糯米糍：好濃朱古力味包裝雪糕球：我第一次見呢款用膠袋包裝嘅雪糕球，有六款口味，包括桃，梛子，曲奇忌廉，榴槤，朱古力同豆腐。我全部都試過，基本上全部都好味，又好滑溜，個人最鍾意桃味。另外仲有一款細杯裝雪糕，不過得芒果味，味道似牛奶公司。
水果有西瓜粒，蜜瓜粒，同哈蜜瓜粒，仲有原個水果如蘋果橙。質素正常。
水果，甜品同大部份沙律都係一兜兜用有蓋膠盒装好，唔環保不過好衛生又易攞。
自助飲品櫃有汽水，忌廉溝鮮奶，檸茶，各款楊協成，其他罐裝飲品等，最正係有多款包裝果汁，我哋只係飲呢隻，當中菠蘿西柚味最好飲。
自助調味有6格。
座位正常，服務都可接受。呢個地方有呢啲食物質素都幾驚喜，折咗每人唔洗$240，都係一次唔錯嘅體驗。不過油煙味重，抽氣要做好啲。
