今次同朋友去試咗旺角呢間韓式麵店 Seoul Noodles，主打傳統韓國湯麵同飯類，價錢親民，份量都幾足～我哋就叫咗佢哋店內人氣之選 COMBO FOR TWO，兩個人食超級飽👍🏻
🍜 蜆湯麵
先講湯底，清甜得嚟帶少少海鮮鹹香，飲落無味精口渴感。麵條煙韌唔會淋晒，蜆雖然唔算大隻但勝在夠鮮～
🥣 羅州牛肉湯飯
牛骨湯底香濃唔膩，啲牛肉切得薄身但唔嚡口，飯浸湯之後完全吸晒牛骨香，食到尾都暖笠笠～
🥟 豬肉餃子
外皮煎得香脆，入面餡料唔算重調味，可以食得出豬肉同蔬菜嘅原味，配埋醬汁更加惹味。
🥬 菜包肉
呢個就好有韓國家庭料理feel～包菜爽脆、五花肉肥瘦適中，配埋辣醬同蒜片，包住一啖食落去，滿足感爆燈！
🥤另外再叫了兩杯飲品
凍梅子茶：酸酸地，解膩一流，食完重口味嘢飲返啖即刻refresh哂～
甜米露：甜度啱啱好，有淡淡米香，入口滑，似飲緊溫柔版糖水～
整體感覺：餐廳細細間，裝修簡單但乾淨企理，出餐快、服務都ok，係想簡單食返餐暖笠笠韓餐嘅不錯選擇～
