日本拉麵源自中國移民喺日本人地生疏，難以搵工做，所以喺街頭賣麵維持生計，其後大受歡迎，基於日本人嘅研究精神，拉麵款式可謂五花八門，各師各法，充滿地方/個人特色。睇報導知道呢間來自埼玉縣嘅拉麵店落戶將軍澳AEON，喺1月30號正式開業，為免同人迫，梗係先食為快啦。
呢個舖位之前都係日式拉麵，而家利用門口位做厨房，窗邊位遠望海景，地方寬敞，簡約裝潢，一貫日式拉麵店風格。坐位闊落，枱面有一系列調味料，最特別係沙律醬，以為係用嚟的食炸嘢用，原來係食招牌油麵時落嘅😁。
大門拉麵$48
食招牌麵先有中肯嘅評價。麵條比一般拉麵粗身，近似稻亭烏冬嘅質感，入口比較硬身同韌，唔會一夾就散，但麵條唔掛湯，湯底濃厚有鮮味，可惜係比較死鹹同油膩，一上枱飲咗一啖已經封喉，唔敢再飲。叉燒經過火炙，比較香口同減低油膩感，竹筍醃得鹹香，味道特出，反而係成碗麵最好食嘅一環。
1
大門油麵$52
其實就係撈麵。只係配料多咗蛋黃同即食麵碎，而少咗竹筍。根據店方建議食法，係要加蒜蓉、辣油、醋同沙律醬其中兩至三樣撈匀嚟食。撈咗蒜蓉，沙律醬同醋先知錯，可能分量唔啱，啲麵同醬料唔係好夾，食落成口油，味道複雜得嚟無預期咁好，食落覺得滯口，只係食到半碗😑
玉子燒$38
玉子卷煎得略為過火，表皮唔夠嫩滑，蛋味一般，配蘿蔔茸食無咁油膩，中規中矩。
呢間拉麵店口味獨特，充滿個人風格，但味道比較重，如果喜歡重口味拉麵或者新奇撈麵食法嘅朋友不妨一試。
