俾我發現到有間新開馬拉菜
本身都鐘意食新加坡同馬拉野
見的價錢都好平民
就入去試下
本身食過好多唔同鋪頭既肉骨茶
新加坡同馬來西亞既都試過好多
講真係香港好難搵到好食既肉骨茶
一係就係太咸
一係就係唔夠肉
再唔係就食連鎖店食到好貴
呢度既肉骨茶先賣50蚊
我都心諗都唔會好食得去邊
但係天氣太熱想食湯飯類既野
又唔鐘意食喇沙味果的面
就叫左份肉骨茶黎食
一黎到睇賣相都唔錯
擺得幾精緻
份量都算適中
不過先50蚊都唔計得咁多
出面隨便食一個都7-80蚊仲要另加野飲
試左一啖湯
中藥味濃得黎又唔會太苦
而且唔會落太多胡椒搞到太辣
味道岩岩好
本身以為的肉可能好少
點知有成三大舊
加埋的菜同豆腐
熱天食其實都夠飽
配埋杯拉茶就天衣無縫
要知道出面連鎖餐廳都係配港式奶茶
要轉拉茶加10-20蚊都好正常
而家50蚊就食到肉骨茶同拉茶係邊度搵？
雖然味道上唔算係好突出
不過不失
不過以咁既價錢味道不差又食得飽黎講
我覺得CP值好高
我見仲有其他咩黃薑飯同椰漿飯睇落都好好食咁
下次經過都要黎試下
的侍應（唔知係咪老闆娘）服務都幾好
會問你的味道岩唔岩胃口
又話可以打電話叫定先
唔駛等咁耐
間鋪唔算大
兩三張檯坐得果十幾人
中午多人都可能好逼
不過勝在價錢夠親民
而且服務態度夠人情味
所以有機會都會再黎試下
不過而家新開試業
質素點都會做好的
希望佢地可以保持到的食物水準同服務態度
咁就可以推薦俾更多鐘意食馬拉野既人啦
因為真係好抵食！支持小店！
