漁釧 (V Walk) (Closed)

南昌港鐵站有個新場叫V Walk，V Walk有間新舖叫漁釧，令我食完再食，D客越見越多，今晚同愛人再去，一早已經滿座要坐吧枱喇😅松葉蟹肉野菜沙律（$98），新鮮蔬菜令碟沙律色彩繽紛，配上鮮味松葉蟹肉及蟹子，就此開動我味蕾。自家製玉子燒（$68），玉子香滑非常，卷得厚，切得頗大件，咬落有層次，微甜超啱我口味👍🏼👍🏼👍🏼👍🏼👍🏼火灸鰻魚芝士芝麻反卷（$118），反卷內有芝士、青瓜、蟹柳，上面鋪一大片火灸得焦香嘅鰻魚，一口一件，口感都非常豐富。海蝦天婦羅稻庭烏冬（$88），即叫即炸，炸爐就在眼前，爐具清潔，炸油新鮮，絕對冇油益味；食到烏冬至覺得佢至係全set嘅重點靈魂，烏冬好滑，一「𠽌」入口如果唔用條脷頂住喉嚨，一定直達入食道🤪醬油濃雞白湯拉麵 （$78），飲第一啖湯已經愛上呢碗麵，好濃雞味，有D似我阿媽煲嘅老火雞湯，但仲要更濃郁，麵質比較粗而且煙韌，好食到飛起🥰