梨滿園韓國料理 (Closed)

今日同屋企人黎樂富UNY超市度買野，見到呢間韓燒，因為好耐冇食韓燒，所以就揀左黎呢間（＄218／位，再加一）。通常揀任食嘅餐廳都會喺好肚餓嘅情況底下先會選擇，見到呢間嘅選擇都好多，而熟食亦都有好多，因為shopping完真係好肚餓。呢度嘅韓燒好方便，唔需要自己出去攞嘢食，疫情底下出去攞嘢食每次都要帶返個口罩，有時都覺得唔喺好方便。我地都叫左好多嘢食，首先講下我同屋企人都最鍾意嘅頂級韓牛仔骨，因為呢個本身調左味，甜甜地，而且亦都juicy。豬頸肉好爽口而且豬嘅油脂好香。芝士腸燒過後個皮好脆，芝士味又正。雞腎黎講我最鍾意就係食佢嘅口感，好爽口。韓式大醬湯有好多料，有金菇，豆腐，蜆肉，個湯都幾濃味，仲熱辣辣。三文魚刺身好肥美，亦都好新鮮。頂級韓牛肩肉同頂級韓牛板腱肉，望到油花好靚，油脂味都幾香。呢度仲可以配生菜同蒜頭一齊食燒肉，咁就冇咁油膩，同埋前菜嘅泡菜都幾好味，又唔會過辣。我地中間換過一次韓燒板，職員做野都好快手。原本好肚餓，食到好飽，呢度都幾抵食。