7點半到左，差唔多滿曬咁滯，好彩仲拎到位。一坐底朋友就即刻派手信，係香蕉味既酥餅，食落同蝴蝶酥差唔多啦，係多D蕉味。
由於有朋友稍遲，所以等左一陣就先叫幾味：黑椒牛油炒硯(冇曬聖子)，椒鹽九肚魚，金銀蛋浸莧菜，豉汁蒸鱔。朋友到後再加碟生炒骨。
黑椒牛油炒硯先上，炒得相當乾身同入味，份量尚算可以，話咁快就清曬。
金銀蛋浸莧菜好難煮得唔好食，所以冇乜好評價，純粹整碟菜冇咁寡。
豉汁蒸鱔，對魚類並非十分鍾情既我，都係冇乜好評價，魚肉有彈口，豉汁夠，合格有餘。
椒鹽九肚魚，係全晚最高分既菜。對於喜愛炸野既我，對椒鹽一直有高要求。而呢度既九肚魚外皮炸得好乾身，唔會過火，話之佢幾熱都快快手清左佢先。
最後上既生炒骨，以呢度既價錢黎緊算係比夠足料，即炸排骨去掛汁真係冇得輸，青椒洋蔥都落唔少。
4個人食，加多2支鴻X堂清補涼同3碗飯，合共399，以同區或者大排檔角度去睇算係貴少少啦，不過食物質素唔錯，性價比都可以既。人手同服務都唔多得，不過黎食大排檔都預左架啦~
