我約左7點，剛上到去，人流不算多，可以拍拍餐廳嘅環境俾大家睇。
餐廳整體以木條、木簾作主要裝飾，滲透出日系溫暖寧靜嘅氛圍。
入面有吧枱、包廂同卡位，大家可以根據自己喜好而預約(因為包廂有客人，小妹不便影相)
而我地就揀左吧枱坐，可以邊食邊欣賞師傅手藝。
因為見唔太貴好多菜式都想試下，所以我跟朋友選擇單點食物。以下係我地點嘅食物︰
枝豆($68)
友人經常說，要試一間餐廳好唔好食，就要試最簡單嘅食物，所以我地叫左枝豆。枝豆表面有鹽粒，挺身飽滿，入口爽脆，係唔錯嘅！
冷蕃茄 ($88)
係餐廳職員推介下，我地點了這款。他說這番茄由種植時開始已用鹽水種植，番茄攝取更多營養，味道更濃郁。一口咬落去有少許咸味，番茄超多汁，而且仲好清香，加上芥末醋調味，味道豐富。
沖繩肉醬豆腐 ($88)
雖然小妹未去過沖繩，都聽過當地有一款好出名嘅墨西哥肉醬飯，我諗呢道菜是以此為靈感吧。係蔥絲上面擺上豆腐，再淋上熱辣嘅肉醬，三樣食物一齊擺入口，口感真係好豐富，蔥絲爽脆、豆腐軟綿。肉醬甜甜地加上蔥絲食，甜中帶微辣，好開胃。
唐揚雞柳 ($88)
呢碟菜式份量好多，不只是菜多，炸雞件也是很多。食落雞肉好嫩滑彈牙，肉汁亦緊緊鎖喺雞件入面，而且沒有油膩感，配上椰菜絲食更清新。
＊生菜豚肉卷 ($48)
這是小妹跟友人都覺得驚豔嘅一道菜式。本身見到豚肉好乾身，以為唔好食，點知一咬落去，吸收左豚肉精華嘅生菜汁喺口腔爆出嚟!仲多到滴係枱面上！加上豚肉薄身，燒得微脆，真係好推薦 !
大葉豚肉卷 ($48)
食完頭先嘅串燒實在好回味，所以友人提議再點一串嚟試下。今次揀左豚肉加紫蘇葉串。見到每串有三件，大家都好開心，因為又可以大飽口福了。不過紫蘇葉味道略嫌濃郁了點，有點搶了豚肉的味道。
＊海鮮茶碗蒸 ($78)
小妹去日式餐廳暇愛嘅係茶碗蒸！而今次呢個海鮮茶碗蒸完全無令我失望。大家由相片都見到茶碗蒸水嫩水嫩，好滑溜嘅感覺！加上表面有高湯，提升整體嘅鮮味。另外，茶碗蒸入面除左加入菇及白果，感到驚喜嘅係食食下見到好大隻蝦！好足料。
鰻魚玉子卷 ($198)
鰻魚好彈牙！每一件壽司都好大件，飽肚之選。
特上壽司拼盤(10貫) ($588)
由於大家都沒料到之前嘅菜式份量咁足，仲點左10件壽司。職員上菜時，仲細心介紹10件壽司分別係用咩魚做，而且提醒我地要由味道較淡嘅海膽壽司開始食。果然，海膽好鮮甜，一啲都唔腥。另一款較特別的是蟹膏蟹肉壽司，蟹膏十分香濃，加上鮮甜蟹肉，食完齒頰留香。
至於壽司拼盤最上面果碗係配以蟹膏醬嘅鮑魚片迷你丼飯。鮑魚片彈牙，加上蟹膏醬，令人口一接一口。
可能因為餐廳係新開，師傅同經理都好緊張客人嘅反應，見食完都會問返意見。職員時不時添茶，收碟都好勤力，服務好好。
