MixUp (Closed)

話說第一次去添福小食摸門釘，當時已經接近兩點，餓到就快暈低，見到對面街有間賣小食嘅，於是開個 app check check，見到都係黃店，就即刻飛奔過去覓食。

買咗推介嘅混醬三寶，包括腸粉三條，魚蛋燒賣各五粒，咁多嘢加埋都只係賣十六蚊，平到你唔信😮。落完單，好快就有得食。首先要讚下嘅係佢混嘅醬果然好多， 絕對襯得起個店名，需知道甜醬，麻醬，豉油同芝麻係一碟腸粉嘅靈魂所在，我最怕食到乾噌噌黐住張底紙嘅腸粉😂。三樣嘢之中，最好食嘅係魚肉燒賣，有少許油脂，唔會硬掘掘得一嚿粉，質素唔錯；腸粉頗軟滑，混埋啲醬一齊食，好滋味；至於魚蛋則屬正常水準。