刺身新鮮又多選擇，厚切之餘擺盤亦非常華麗！有珍寶赤蝦，八爪魚，三文魚，油甘魚，希靈魚，醬油吞拿魚，珍寶赤蝦超級無敵大隻，大大啖彈牙爽口蝦肉入口超滿足。而且餐廳仲有多種甲殼類刺身，例如馬刀貝，北海道角螺，赤貝，冰山蚌，鮑片！
另外升級到任食生蠔，生蠔即開即食，少少海水味非常清新，肉質較爽口，沒有大金屬味。仲有厚肉鮮帶子包住香甜海膽，兩樣入口互相提鮮更有口感！
重點係一定要食大閘蟹，即叫即蒸需時約25分鐘，所以一坐低就記住快啲order！隻隻足四兩，蒸完已經見到爆蟹膏，蟹肉香甜，蟹粉入口幼滑如絲又甘香，而且隻隻殼薄肉嫩，肉質豐滿。
瀛豐放題料理專門店提供中、日、泰式料理，其中泰式料理相當不錯，我最鍾意個冬陰功湯，酸辣勁醒胃，另外沙嗲串燒夠惹味！日式料理方面，壽司細細件，可以食多幾款都唔怕，而且配搭吸引！
最後唔少得飲品同甜品啦！有Hoegaarden 同Stella Artois任飲，至少30款不同汽水，茶飲，以及數十款甜品，見到都開心🤩！
