後尾試過地區團購可以係屋企一睹風采之後念念不忘，今次行過荃灣見到分店又大又坐得舒服，因為係商場入面所以排隊位仲要有冷氣，毫無懸念入嚟食
平日早啲嚟仲要唔使等位直入，座位寬闊舒適仲有梳化座，專登行過黎食爸爸都即刻無炸型
呢度有沾麵同拉麵，兩隻為食豬當然想試哂兩款，咁就叫唔同口味啦
叫多個小食share，再加一人一野飲，加埋都唔駛$300食到捧住個肚走，真心抵食
爸爸係門口見到期間限定既海報已經心心眼
蠔係我地兩個既favourite，呢度個沾麵連個沾汁都用左牡蠣汁，必試
三隻蠔非常飽滿肥美，輕輕用火槍燒一燒至表面金黃，裡面仍然多汁唔乾，一咬落去滿滿蠔汁爆出，超正
牡蠣沾汁用蠔同豚骨熬製，兩者味道比例平衡，濃郁稠杰得黎夠鮮味
仲有紫洋蔥絕對可以除去海鮮既腥味
粗蕎麥麵條沾湯汁食好夠掛汁，凍麵熱湯既正宗沾麵食法先可以保持到麵條彈牙唔過腍，食落去唔糊口，仲係條條分明
拉麵就要左海老湯底，因為外賣無試過拉麵，第一次食呢度既拉麵都好滿意，熱辣辣係得堂食先做到
櫻花蝦基本上係鋪滿晒成個碗面，超級足料又夠鹹鮮味
拉麵本身已經有半隻糖心蛋、兩塊厚切半肥瘦叉燒同埋筍乾，唔額外加料都非常豐富
幼麵夠彈牙，鍾意食硬麵嘅我都覺得佢個口感唔錯。
果次外賣唔敢食炸雞，怕外送到屋企會好腍。今次堂食終於有機會試，果然炸得非常乾身唔多油。最重要係入面嘅雞肉仍然好嫩滑多汁，選位唔會太多肥膏，咁既價錢有咁大隻既四件係超級抵食
野飲分別叫左綠茶可樂同埋Sage既蘋果桂花烏龍有氣茶。前者比普通可樂多左份抹茶味，本來唔太鍾意飲可樂嘅我都覺得幾好飲。
後者Sage既出品本身都係行花花路線，除左靚包裝仲有花花香味，用上台灣直送原片茶葉同埋香港製造嘅桂花糖，蘋果味就係100%純蘋果汁，係非常有心思嘅香港品牌
