純粹個人睇法，我覺得一間食市既服務質素比食物質素重要，當然唔係話服務好就可以整d垃圾出黎比人食，不過同樣地係我個人角度，今次證明左服務質素好真係好重要，十一點幾去到本身唔係好多人所以我坐左四人台都無職員介意，仲好好禮貌向我推介佢地最新推出既幾種食物(點心紙上未有)，其中既炸菜雞絲腸粉我好有興趣，所以要一個加多龍燒賣，即叫即蒸，等左一陣個腸粉先黎，未落鼓油，個阿姐就問我需唔需要，佢話因為炸菜本身都咸所以唔知我想唔想加鼓油，我話要佢就同我加落碟邊，基本上每一個客人佢地都係咁做，我覺得幾周到，不過講碟腸粉既質素應真麻麻，皮厚而且唔滑竟然仲有小小痴牙，不過唔算太過份，然後到個燒賣，出晒煙我都要等一陣先影得相同埋食，其實都唔算係好特別，總之叫做我食過之中算好既。
到我差唔多食完既時候可能已經進入繁忙時間，客人開始多，開始要搭台，我見有四個人入緊黎，我果陣都已經食晒仲有半杯茶未飲，都拿拿淋飲埋就起身走，d阿姐見倒都即刻同我講唔好意思，其實駛乜唔好意思，又唔係你趕我走我自己起身姐，本身我覺得香港人有個好黑人憎既習慣，就係係食市好鍾意食完坐返你幾十分鐘先肯走，真係理得你出面排幾長龍，總之我比左錢就大晒咁，我就永遠唔會咁做，因為我自己係一個好憎等既人，所以我都唔會想要其他人等一d無謂既時間，尤其係每次有類似情況我都會諗起某次係某吉列專門店發生既事，我都盡量會讓下其他人。
總括黎講呢度既食物質素真係好一般，但我一定會再黎，點解相信唔駛多講了，食得開心的一餐。
以上全為個人意見，請勿在意
