一碗車仔麵

一個人晚餐，打算草草了事。走到附近有車仔麵，點知滿座，就行到隔離嘅一碗試試，反正新開至現在都未食過。

坐低第一個感覺，係光猛乾淨，無一般車子麵檔常有嘅豬大腸羶味，十分舒服。員工亦禮貌招待。

點左牛筋豬大腸魚皮餃米線。十分欣賞腩汁湯底，濃郁唔油膩。豬大腸滷得夠透, 冧滑，無嗰種倒胃口嘅羶臭味，一就有滷水香走出黎，讚! 牛筋亦入味，不過嫌有點太冧欠咬口。魚皮餃爽身亦不錯。

連凍飲先卅零蚊，有咁嘅食物質素同環境招待，係超值了。