添好運有好多間分店，今次黎到北角分店，由於添好運既名氣大，就算黎到唔係遊客區既北角都依然見到好多遊客慕名而來。
店內環境擠逼，但都無損我食點心既慾望。
叫左5樣點心，上菜速度都算快，所有都好新鮮全部熱辣辣。
酥皮叉燒包
添好運最出名既酥皮叉燒包，一碟有三個，外表脆身，上面既皮甜甜地，入面叉燒熱辣辣，叉燒粒份量多，甜鹹夾雜，十分好食！
叉燒腸
飲茶點可以少得腸粉呢，叉燒腸一碟有三條，腸粉軟滑，入面有叉燒同埋蔥花係入面，叉燒有肥有瘦，配腸粉份外夾。
鹹水角
鹹水角外脆內軟，而且新鮮炸出黎，入面既糯米皮配上冬菇粒同肥豬肉碎，係我每次飲茶必點既點心。
蝦餃
蝦餃一籠有四粒，皮薄，蝦餡多，而且新鮮。
燒賣
最後係燒賣，一般街邊檔既燒賣我都會稱佢做假燒賣，因為粉質好重，唔好食。反而食點心既燒賣係真係用豬肉做，所以口感好食好多。
