一開始就先黎前菜木耳同豆角，個人較鍾意豆角個調味好到位爽脆得黎又有啲辣，開胃！
刺身種類繁多，其中三文魚同蝦既質素好似食緊日本餐廳一樣，食完之後胃口更好！
跟著係其中重頭戲原隻蠔皇扣鮑魚，鮑魚煮得透徹入晒味，唔會係食橡膠咁值得一讚。
下一樣都係海鮮粉絲蒸扇貝，扇貝size中等，熱辣辣食都係爽滑既口感，比多啲粉絲撈汁就更好。
跟著係雞煲，今次我地都唔太舒服，叫左唔辣就算，但店員細心幫忙炒雞煲係幾舒服，同時雖然我地自己開頭冇留意時間煮耐左但雞肉都唔會老，食到一半加水魷同豬皮十分惹味。
食完雞煲就到戲肉打邊爐啦，今次叫左豬骨煲，豬骨大大件，想食骨髓既朋友可以一試。
同一時間上場有牛頸脊，雖然唔係任食但最緊要靚，見到佢都雪花均勻，食落都好軟滑。
另一邊有海鮮，其中蟶子同象拔蚌bb好鮮甜，龍躉片厚肉結實，蝦都係新鮮彈牙。
係打邊爐既時候有分到任食同加錢部分，其實前面食左唔少味菜，任食時段都未必食得落好多野，不過手打墨魚滑同年糕丸都係小弟至愛。
最後今日有個提子乾黑糖冰粉，食完就完滿地抱住個肚返歸啦。
總結佐敦倫哥座位舒服，員工服務都唔錯，三、四百蚊有咁多野食仲可以加雞煲龍躉的確唔錯。
