先黎個豐料燉湯, 好大煲呀......聞上去都有少少藥材味, 但飲落又冇藥材味喎, 可能因為有個魚頭既關係啦, 飲落仲好清甜....最後我忍唔住飲左兩碗. 飲完湯到個京式片皮鴨, 其實我好鐘意食片皮鴨, 最鐘意就係用薄皮加醬同片皮鴨包埋一齊食, D薄皮仲好熱...片皮鴨就肥瘦適中, 如果隻鴨肥多數食幾塊就覺得飽飽地.
我地食到咁上下又到條魚啦, 呢條沙巴龍躉真係好大條呀, 感覺仲好抵食...咁多條先二百幾蚊, 不過最出色既係...咁大條魚完全唔會"un", 真係蒸到岩岩好呀, 出去食咁多次飯..真係唔係間間都煮得好條靚魚, 岩哂我D鐘意食魚既魚怪.
我地仲點左2款菜食, 有海鮮雜菜煲同生菜蠔大利, 食咁多肉都要食下D菜, 跟住上左款梨山醬手爪骨, 呢款一上台就聞到超香既味道, 真係叫到都忌唔住吞口水, 佢D醬酸酸甜甜, 外皮脆脆地....啖啖肉, D醬用黎同飯一齊食一流. 最後就到個臘味飯啦, 天氣咁凍唔食飯真係唔得, 同埋呢個時候最岩食臘味飯, 超大煲飯同勁多臘味, 不過即使臘味有幾出色都好, 都要有豉油配埋先好食, 我想講佢既豉油都好出色, 我食左2碗飯就收口啦...因為今晚真係食得太多啦!
