一入門口就見到好多遊戲選擇，適合唔同年齡既大人同小朋友，適逢當日係萬聖節，孖啡亦有裝飾品應節，一個個裝飾掛係天花板，幾新奇有趣。
因為已經好肚餓，所以我地就拎起餐牌叫左野食先，我就叫左個芝士焗吞拿魚天使麵（$66），跟餐只需再加（$28）配個芝士蛋糕，朋友就要忌廉煙三文魚配天使麵（$76），依個價錢仲包埋一杯（$38）蚊飲品，可以講得上係價廉物美。
餐廳上菜速度好快，轉眼間就可以試下芝士焗吞拿魚天使麵，芝士遍佈表面，食落去非常多汁，香口好味，忌廉煙三文魚配天使麵，餐廳花心思將三文魚擺成一朵鮮豔既花出場，好睇又好食。
食完主菜就可以上甜品，芝士蛋糕味道香濃可口，出場形態岩岩好，一方面唔會硬到切唔開，另一方面又唔會已經融化，恰到好處。
餐廳環境舒適寧靜，可以一邊食一邊玩，價錢相當合理，適合三五知己聚首一堂。
