Set dinner 好吸引，性價比高。我哋2個人就決定叫一個set 同試其他。
晚餐有多種選擇，每個餐都配有沙律、餐湯。
第一個上係沙律，一見成碟沙律菜顏色已令人充滿食欲，新鮮沙律菜配醋汁非常夾。
南瓜湯，好creamy，南瓜味道濃，相信喺直接用南瓜打蓉成湯，有心機。
蒜蓉法包，少少蒜味，味道不會over, 烘得香脆!
甜椒蟹肉焗脆鬆餅：呢個超級好味😋，沒想過將鬆餅焗到脆身，係有另一番風味！外層脆卜卜，餅上嘅全部都係蟹肉，份量十足，而且不乾身，加上少少辣味，令到呢味菜提升層次感！
馬來西亞叻沙煮美國馬拉蜆：蜆肉每隻都大大粒，係諗過咁大粒，無沙無腥味！入口啖啖肉！湯汁鮮甜，好似飲緊碗蜆肉湯咁！
黑松露溫泉蛋烤大啡菇焗粗管通粉：
上枱賣相ok, 已經有淡淡的黑松露味，但一放入口黑松露味充滿口內，啡菇肉厚好味，切開溫泉蛋，將蛋汁、黑松露及芝士拌混食，又一美食，cafe 揀咗粗管通粉，非常聰明，有更多汁包住粗通粉，口感非常豐富！
最後set dinner 優惠價加配咗一個甜品，焗肉桂蘋果脆脆：外層焗到金黃色，粒粒蘋果，加上表層嘅脆脆，再混入凍冰冰嘅雲呢拿雪糕，入口感覺好豐富，超正！
呢間餐廳值得一讚嘅係！樓面只得一個男仔，但佢一個招待全餐廳嘅客！由迎賓、落單、傳菜、執枱一腳踢！佢仍然可保持好好嘅禮貌，實在欣賞！所以可以支持下小店!
