蔥香烤牛舌 $38
牛舌切到厚薄適中，爽口有油香，牛香味濃，配蔥香同檸檬汁好夾，作為開胃小食一流～
北海道薯蓉芝士年糕 $28
芝士年糕煙煙韌韌，裏面嘅芝士流心甜中帶鹹～ 平時食嘅芝士年糕都冇加薯蓉，呢個加咗薯蓉口感更多重層次～
海苔天婦羅魷魚 $28
入口嘅時候熱到燙口，天婦羅皮厚薄適中又唔會太油，炸得金黃香脆，魷魚爽口，中間加咗海苔粉，另外再點七味粉沙律醬好惹味，令人食唔停口，必食推薦
日式唐揚雞湯咖喱 $78
Suage原味咖喱湯配烏冬，充滿日式咖喱風味嘅咖喱湯，湯底香濃，烏冬好滑好掛汁～ 日式唐揚雞火候炸到啱啱好，外面香脆，裏面雞肉保持嫩滑，肉汁juicy～ 調味亦恰到好處，香口惹味，推薦必食～
炙燒豚角煮湯咖喱 $92
炙燒豚角肥瘦適中，好厚身，肉質淋身幾入味，燒得幾香～ 每款湯咖喱配菜都好豐富，包括炸餃子，燒南瓜，糖心蛋，蓮藕，蕃茄，燒茄子～ 糖心蛋糖心效果唔錯，蛋香味濃；燒茄子好香；蓮藕爽脆；燒南瓜香甜～
士多啤梨抹茶奶 $38
層次幾靚，底下係士多啤梨果醬，上面係抹茶奶，士多啤梨味較重，蓋過抹茶香味～
日本甜王軟雪糕 $30
士多啤梨味香甜，有淡淡嘅奶香味，軟雪糕香滑creamy~
整體主食同小食都好出色，而且價錢親民，可以食到咁有特色嘅北海道湯咖喱，職員服務態度都好親切，地點方便，約朋友食飯係唔錯嘅選擇。
