裕興咖啡

Open Now

Now Closed

日日都係期間限定! 無錯，每日中午1點就收工，10點就賣晒招牌菜嘅炒蛋三文治。今朝忽然早咗起身，把心一橫早啲出門去裕興食個早餐先返工。7點半左右到達，已經見到有個婆婆坐係到。坐底時老闆望一望講咗句: 8點先開門喎。過一陣老闆娘走過嚟落單: 你第三個，等二十分鐘有無問題? 咁緊係無問題啦。 十分鐘後老闆娘送嚟三文治，金黃色嘅外層、花生醬嘅香氣，未食已經知道等咁耐係值得嘅。餡料層次分明，一層扣一層。蛋煎得香濃唔老，椰菜清新減去部份咸牛肉嘅死咸，外層多士用上麥包，烘得香脆但又唔會乾憎憎，中間再配上溶化嘅花生醬，口感味道豐富。想呃like嘅可以揀芝士作為餡料，或者加$5直接嚟一份三併，芝士加熱後會有流心效果，而我呢種Uncle哥哥就免喇，quota有限。 一人製作，即叫即做，時間係必需。放慢腳步，慢慢品嚐，一啖蛋治，一啖奶茶，食飽又可以向晴朗一天出發。