放題分三個套餐，主要區分海鮮加牛肉，潮汕牛肉同美國牛肉。而全部放題套餐包紅酒、白酒、指定啤酒同多款飲料選擇。仲有多款海鮮蔬菜火鍋配料係自助區，又有各式小食同雪糕任揀。
我地揀$338，有150分鐘慢慢坐慢慢食，入座前先選擇湯底，有6款。坐底就上湯底，選招牌潮汕牛骨湯，肉味濃，湯色清，蘿蔔吸哂湯精華好淋。仲上一個牛肉圈，一次過有齊5款潮汕牛，每款仲有小提示需要淥幾耐，可以試齊再用QR code落單，新鮮牛肉牛味相當重，肉色有光澤，各款有不同口感，好豐富。套餐仲送上一盤海鮮拼盤，有新鮮鮑魚蝦蜆。大推炸午餐肉，炸到四邊脆口，夠晒邪惡。另推蝦滑，見到大量蝦，好足料，口感新鮮彈牙。
