今次就試咗佢哋嘅堂主套餐，7:30前埋單每人只係$248就可以任食40幾款火鍋配料！今次我哋就揀咗花膠美人鍋，一上枱已經俾佢嘅龍頭鍋surprise到，好有氣勢🤣 花膠同埋紅棗都完全唔吝嗇，湯底都好鮮甜，絕對有驚喜🤩
餐廳用QR code落單，而丸類同埋蔬菜就係自己出去拎嘅！首先肉類方面有美國SRF和牛、牛肩胛、紐西蘭羊肉、雞肉、同埋黑豚肉😋和牛方面脂肪比例適中，唔會話成塊都係肥膏，而且最欣賞嘅就係每一塊嘅厚度都適中，識落好有口感仲充滿牛味👍🏻海鮮方面就有蜆肉、海蝦、廣島蠔同埋甸鯇魚片😍海鮮大致上都有鮮味，而且今次嘅蜆肉完全冇沙值得一讚😋
另外丸類同埋蔬菜都係有保鮮紙包裝或者用食物盒封存，符合衛生標準！丸類嘅選擇都幾多！大力推薦要order手打墨魚丸，食落非常之彈牙而且真係粒粒都食到墨魚肉，我自己一個都encore食咗成10粒🤪除咗基本嘅火鍋配料外，呢度仲有唔同嘅熟食小菜選擇，例如鹽酥雞、涼拌雲耳、雞腳同埋泡椒雞翼尖等，最啱攞嚟過吓口癮😍 最後一個賣點就係呢度有自家製嘅竹蔗茅根，清甜解渴最啱一路打邊爐一路飲！
