Read full review
2017-02-24
4337 views
由酒店星級餐廳跳出嚟自立門戶,更晌2015年摘星,自當有其理由。專登挑晌人流較少上環嘅荷李活道對上一截差館上街,相信唔單因為對自己嘅出品有信心,更喺貪其環境幽靜,甚有法國小街斜巷嘅風情,主打傳統法式及新派歐陸菜、又加入不少日本食材嘅Upper Modern Bistro,喺由米芝蓮星級大廚Philippe Orrico於香港首間開設嘅餐廳,更讓人期待。行到差館上街街口,由於餐廳都幾近路口,所以,一眼就望到。灰底黃線嘅鋪面,都好易認。餐廳採半開放式,近門口嘅位置對住開揚街景,過路嘅都喺唔匆忙嘅街坊,真喺好有身處外國嘅感受。走進餐廳,裝修摩登時尚,原木配灰色為主調,猶如魚鱗嘅牆壁及天花裝飾,令環境更顯型格。中午嚟到用餐,客人唔算太多,讓人感覺更閒適自在,非常輕鬆。午餐有兩類選擇,一個喺平啲又快速啲嘅Express Lunch,另一個菜式選擇多啲,食得豐富啲,當然喺貴啲嘅Set Lunch。前者只喺$188 + 10%包餐湯或沙律、主菜二選一及是日甜品,餐飲需另加$20;而後者則分3個價位:兩道菜($268)、3道菜($308)或4道菜($348),包餐飲,何謂4道菜呢?主菜只可揀1次,即喺
平時晌啲高級餐廳,都喺以麵包「籃」先奉客,小弟都喺第一次遇到麵包「袋」,黑底紅字嘅麵包小布袋裝滿法包,蠻有趣。雖然啲包唔熱,但法包外層極之脆口,一咬成枱都麵包碎,而包身好軟熟,感覺有份「新鮮」感,塗啲牛油已好唔錯。 隨後送上前菜,一共有6款選擇,有餐湯,有沙律,亦有啲類似小食,其實好多款都好有興趣,最後揀咗一款烤八爪魚嘅暖沙律。 Roasted octopus & ratte potato salad, Arugula, Spicy sauce
小弟稱之為「烤八爪魚法國薯仔暖沙律」,喺一道幾特別嘅沙律,配點火箭菜,感受到做得細緻、恰到好處。沙律微微暖,易入口,八瓜魚好軟腍、柔滑,而法國薯仔(Ratte Potato)算喺較少見嘅食材,薯仔連皮切成一片片,食落好香薯味,又好似有朕果仁香,軟軟粉粉。醬汁亦有心思,味道帶點酸,灑咗少少辣粉,辣度雖輕,卻有畫龍點晴之效。依道菜被定為暖沙律,其實,亦可視為一道熱前菜。
68 views
1 likes
0 comments
主菜嘅「慢煮牛仔肋肉伴意式馬鈴薯丸子、意大利鹽漬豬脂薄片」確喺讓人有嶄新嘅體驗,首先,件牛仔肋肉大大件就睇得人好興奮,落刀到嗰吓已感受到好鬆化,軟腍到唔使點咬,無牙公公都食到,而且牛肉味極為濃郁,配個燒汁好襯。此外,「伴菜」喺古老意大利Colonnata地區嘅鹽漬豬脂薄片(事後上網翻查嘅其中一個譯名),簡單嚟講,喺以海鹽、大蒜與迷迭香等香草醃漬豬肥肉做成,睇落好似成片豬膏,但出奇地又唔喺咁肥、咁油膩,感覺似似哋啲巴馬火腿。
97 views
1 likes
0 comments
賣相一如傳統嘅法式甜點,唔止要好食,仲要好睇得,猶如藝術品般嘅「法式勃朗峰栗子蛋糕伴香橙雪葩」,喺咪好有美感呢?絲帶朱古力、蛋白糖霜脆餅條、鮮黃花瓣都喺非常有心思嘅裝飾。有無留意到啲栗子蓉唔止唧得幼細,而且感覺好亮麗,完全無話放晌餅櫃雪咗成朝「乾爭爭」嘅感覺,無估錯嘅話,啲栗子蓉都喺有落單時先直接唧落碟。
72 views
1 likes
0 comments
唔好怪小弟老土,甜品點都要搵杯咖啡嚟襯,餐飲唔止可以揀即磨咖啡,其他特色咖啡如意大利泡沫咖啡、鮮奶咖啡一樣可以揀。眼前嘅鮮奶咖啡入口頗香醇,只喺撞奶泡嘅手勢未喺好平衡,唔喺每口個口感都咁勻一,其實,從拉花及奶泡嘅泡紋都粗略估到會有咁情況。不過,小弟就好鍾意隻咖啡杯,鮮橙色,好醒神,天寒嘅日子望落去有種溫暖感。 品嚐過3道菜之後,做菜嘅水準真喺唔使點懷疑。而環境又舒服,服務亦一流,上每道菜都會換上合適嘅餐具,一道菜接一道菜,相隔幾分鐘先上,等你有回味嘅時間,上菜 侍應都會簡單介紹個菜有咩成份同特色,等你可以更用心欣賞當中嘅亮點,更喺小弟學嘢嘅時間,UMB確喺值得推薦嘅餐廳。
Post