由6點睇到差唔多9點，睇完點都肚餓，所以就喺戲院出面求其搵一間算
好求其咁睇吓個餐牌，覺得不錯就直接同侍應講兩位，好彩即刻有位入得
其實去過呢頭都知呢度似係半 food court，所以間舖只係一個長方形，一眼睇晒唔係太多位
因為呢排天氣凍，戲院冷氣又勁，所以叫咗個石鍋飯，最緊要夠熱辣辣
北海道燒芝士咖喱烤雞扒石鍋飯（$60，晚市要再加一）
坦白講成兜真係冇晒配菜，得芝士、咖喱、雞扒同埋飯，不過冇配菜對我而言冇問題
雖然最後都係逃唔過食飯焦（只係小小啫），但係一開始都有搞一搞啲飯，用咖喱汁避免啲飯痴底
作為主角嘅雞扒表現唔錯，咬落唔會太韌，加上咖喱汁同埋芝士，令到口感更加豐富
咖喱汁唔會太咸，溝飯食都唔錯，但係芝士嘅味道唔算突出，個人而言今次係適中，不過芝士控可能會有啲失望
至於份量嚟講都算係適中嘅，起碼夠一餐晚飯嘅份量，不過呢$60係得個飯，並唔係餐，個人而言就差小小野咁
下次可能會有，不過會試吓其他餐廳先囉
