呢度地方真係好淺窄，又多人出出入入，要接受到先得，店內多數2人枱，得2張4人枱，多人要坐街邊，全自助，要自己等位，唔會有店員叫飛，今次我哋都ok好彩只係等咗10分鐘。另外要自己買飛，買完飛等order到，佢有一個order no喺飛度，有嘢出店員會大叫order no，係你嘅就要舉手叫佢過嚟。奉勸好肚餓嘅就唔好食呢間，因為佢啲order全部即叫即做，叫親pizza都叫你預45-60分鐘，但其實大約30分鐘就有。同埋要自己攞紙碟同刀叉。
7個人，我哋叫咗1個凱撒沙律、1個菠菜綿羊奶芝士雲吞、1個24吋Paisano's Pizza
凱撒沙律：太快消滅所以無影到，勁多芝士
菠菜綿羊奶芝士雲吞：堅正，個汁同啲餡都有菠菜
主角24吋Paisano's Pizza，半徑有我隻前臂咁長，真係飽都呆咗，有一個朋友因為唔食creamy嘢無食雲吞，所以認頭咗2件，佢食完飽到對眼爭啲跌出嚟
overall嚟講啲嘢都ok，你話勁好味又稱不上，有一半係因為佢新鮮熱辣，所以如果下次叫大pizza最好有齊8個人，因為食第二件嘅時候凍哂就無咁好味，但以呢個價錢嚟講真係無得彈，我哋7個人叫咗3樣嘢370蚊，一人53蚊，嘢飲你可以喺度叫又或都去7仔買，佢唔會干預你，我就叫咗杯大Asahi 30蚊。
唔夠人又或者唔想叫一個又想試吓大Pizza嘅，佢有個餐係24" one slice cheese pizza + 1 bottle beer set = 40蚊。滿500蚊可送外賣，最遠送到將軍澳。將軍澳以外嘅朋友就要自己揸車入去攞喇！
下次想試脹卜卜嘅意式餡餅~
