醉瓊樓飯店 (西貢街)

Open Now

Now Closed

星期日成班人去呢間經典嘅醉瓊樓開餐，叫咗一圍全家歡套餐，總共七餸一湯加甜品汽水啤酒。先來鴻運灼蝦，好大隻蝦好爽口，點埋豉油，好有口感好味道。跟住飲咗胡椒白果豬肚湯，胡椒辣辣地驅寒，呢度冷氣都算夠，啱晒，豬肚煮”林”幾好食。跟住有時果西檸鴨，酸酸地好開胃，鴨好軟熟，唔會炸到好多粉，薄薄的。跟住有個梅菜蒸鯇魚，好大條鯇魚呀，蒸到啱啱熟，好鮮味。嚟到醉瓊樓最緊要食鹽焗雞，呢隻雞好大隻，我最鍾意食雞胸肉好大舊，好入味，點埋沙薑汁，真係呢度招牌菜，無得頂。跟住京都骨大腸，京都骨，酸酸地，完全唔靭，大腸好脆好香口，翡翠炒雜素，清清地，食啲菜幾好。最後一個腰果炒肉丁，炒得好有鑊氣。最後食個綠豆沙，估唔到呢度啲糖水都煮得幾好，大家吹下水食咗個幾鐘散水。