侍應先招呼開菜再放低一碟花生作為收費酸菜，服務唔錯，見有特價菜，我地都揀咗一份。
金薯牛柳粒
牛柳粒鬆軟，所有配料都經過油炸，另有蜜糖豆，用炸米網盛載，擺盆味道都唔錯。
啫啫唐生菜
加入蝦乾同肉碎啫個唐生菜，上枱出晒煙超級咸香惹味，不過真係重手咗，食到底就太過咸。
椒鹽鮮魷
用超薄粉炸，魷魚應該先出水，食落比較濕，椒鹽唔多均勻有啲咸有啲唔夠味，不過有隻兔仔蕃茄仔擺盆，睇得出有啲誠意。
新鮮鳳梨拔絲咕嚕肉
擺盆中間放乾冰製造出煙，作用就無乜，不過又幾好睇，新鮮菠蘿微酸，咕嚕肉炸得好脆，甜酸汁掛得啱啱好，幾好食。
最後送上木瓜雪耳南北杏糖水都幾清潤。
1
