3個人都係300幾找數，不過又唔好咁開心住～
名館都算係個啲新派中菜，花款都幾多，味道都唔錯嘅，不過每碟嘅份量就唔算好多，兩三個人食就幾好嘅，可以試多幾樣，不過多啲人就麻麻啦
呢餐就食咗 瑤柱冬菇肉鬆蒸飯，金銀蒜蒸娃娃菜，椒鹽魷魚鬚，咖喱手撕餅，黑椒蔥爆安格斯牛柳粒。
最好食嘅係個蒸飯同手撕餅，蒸飯嘅份量係一人份，不過如果唔係食好多飯，兩三個人分嚟食都ok，入面唔係得白飯，有加咗啲類似小米嘅嘢，個蒸飯好夠汁，唔太鹹。
咖喱手撕餅，就係得咖喱汁同啲餅，餅都有好多塊，完全啱晒鍾意撈汁嘅人，個咖喱汁仲要幾唔錯。
魷魚鬚份量超多，就算兩三個人食，食完都會有啲漏，不過點埋咖哩汁又幾好食喎
至於個牛柳粒，味道係幾好，好有鑊氣，不過牛柳粒就太少喇，成碟都好似係得10 多粒，燈籠椒得3片，其他全部都係蔥，真係蔥多過肉，唔抵食。
講咁多，其實最嚇人嘅係呢度嘅衞生囉，竟然比我哋見到有小強，仲要我哋叫人消滅佢，講真出去食廚房有曱甴，唔可以話預咗，不過有又真係唔出其，但係無理由要俾客人見到囉
我諗我都未必會再去幫襯
