湯底方面我哋揀咗藥膳田園蕃茄濃湯，一上枱已經聞到陣陣蕃茄香同少少藥材味，湯色濃郁但唔會太油。入口先係酸酸甜甜嘅蕃茄味🍅之後帶出淡淡藥膳香氣，好舒服又唔會覺得燥，煮菜特別啱，浸耐少少啲菜仲有陣天然甜味。煮肉方面，蕃茄湯底會令牛肉帶少少酸香，仲幾開胃😋
講到重點嘅霜降牛小排🥩真係必試！牛小排油花分佈好靚，切片厚薄適中，落湯輕輕一涮，大概十秒左右就食得✌🏻入口嫩滑又有牛肉油脂嘅香甜，肉味濃郁但唔會有騷味，配上蕃茄湯底更加鮮味。記得唔好煮太耐，否則會影響口感。
其他配菜都算新鮮，菜類爽口🥬丸類好多選擇💯。醬料區選擇唔算超多，但基本嘅沙茶醬、蒜泥、辣椒都有，自己調配都夠玩。
建議如果想食得更盡興，可以早少少去或者預約，因為晚市人多同埋有買一送一優惠要等位。90分鐘雖然足夠，但如果朋友多、傾計多，可以一開始就先落啲耐煮嘅料，例如粟米、蘿蔔，咁就唔怕浪費時間。整體嚟講，呢個台式火鍋套餐價錢合理、食材新鮮，霜降牛同蕃茄湯係亮點，無論同朋友聚餐定情侶約會都啱晒🤗
