福炉端燒と牡蠣 (Closed)

舖頭細細，得幾張細枱同bar枱，週末午市好快滿座。廚房接近用饍區，好在油煙味不大。 午市套餐抵食，七十五蚊有串燒拼盆有前菜有飯有麵豉湯有凍檸檬綠茶。另外叫咗燒鯖魚定食，六十八。 前菜係撈咗甜醬嘅魚仔，甜甜地又香口，幾好味。麵豉湯正常水準。檸檬綠茶味淡到似有味水，但食完熱氣嘅串燒飲又唔錯。 主角串燒水準合格，肉同魚燒完香口又唔乾身，魚亦無腥味，只嫌鹽落得略重手。 無論價錢同水準都屬合理水平，難怪得到街坊支持。