餐廳以室外花園為主題，比人既舒適又寫意嘅感覺，呢到9成以上都係室外位，另外最有特色嘅係露營帳蓬位，不過設最低消費。
坐低後會提供QR，可用手機掃瞄點餐。今次只係2個人黎，食得唔多野，只係叫咗小食、主食、甜品各一。
牛油果蟹肉他他脆餅
餅底好脆，面層的牛油果蟹肉好creamy，食到啖啖蟹肉，不過牛油果味唔算特出，而且有點過鹹。
帶子蟹肉南瓜意大利飯
意大利飯嘅軟硬度剛剛好，只係有D乾，可能個人比較鍾意多少少汁。意大利飯有淡淡嘅南瓜味，如果蟹肉可以再多D就更好。
飲品 - 戀愛預告 & 紅都面哂
呢到凍飲嘅名稱好特別，例如朋友點嘅「紅都面哂」，就係西柚汁。餐牌見到有「阿婆的秘密」及「藍藍天空高掛我的夢」，其實係沙冰。
另一杯飲品係「戀愛預告」，顏色非常夢幻，係荔枝汁配上碟豆花，加入玫瑰花蜜，杯底仲有2粒荔枝果肉，最上層有一球雲呢拿雪糕。味道好清新，唔會好甜。我無搞勻雪糕一齊飲，而係由得佢慢慢溶，所以飲到最後只係得返雲呢拿味。下次再黎，我應該會走雪糕，哈哈~~~~~~~
甜品 - 玫瑰伯爵茶奶蓋瀑布蛋糕
呢款甜品好受歡迎，好多人都會先落單及揀餐後上，如果等用餐後先落單，有機會賣完。
甜品擺盤算精緻，碟邊有生果圍著，再有少許玫瑰花瓣，蛋糕旁邊配上一球伯爵茶味雪糕，最啱打卡。蛋糕由膠片圍住，慢慢將膠片向上移開，奶蓋就會好似瀑布咁瀉下。伯爵茶雪糕味道十分特出，而伯爵茶味嘅蛋糕配上玫瑰花奶蓋，入口滲出淡淡嘅玫瑰花味，與伯爵茶味十分相配。
