1
成日經過觀塘呢間酒樓，都覺得佢外型好有特色，古色古香咁樣，好似好有歷史嘅一間懷舊酒樓。放假終於同屋企人去打卡試咗，食咗一啲小菜，味道都幾好。
坐低冇幾耐侍應就送上小食，呢個小食都幾特別，除咗有常見嘅炸花生之外，仲有一啲酥脆魚仔同埋炸蝦仔。我哋一路食一路揀餸點菜，好香口。
黃金豆腐
一口一粒嘅豆腐炸得外層香脆，裏面嫩滑嫩滑，炸粉薄薄的，椒鹽嘅調味恰到好處，沾上喼汁食更加滋味。呢個小食香口又惹味。
鮮果咕嚕肉
咕嚕肉肥瘦適中，炸得恰到好處，唔會太乾，但係又有少少脆嘅口感，裏面肉質鬆軟，配上酸甜酸甜嘅醬汁食，簡直係食到唔停口。配料嘅部份有菠蘿、黃椒、紅椒同埋一啲洋蔥。略嫌色彩方面失色咗一啲，可以更加繽紛，但係味道係冇得彈嘅。
乾煸蟹籽粉絲煲
粉絲煲用瓦煲上好熱，好香鑊氣，一上枱已經香噴噴，色彩繽紛。粉絲夠乾身，豉油香氣濃郁，配上椰菜絲、紅蘿蔔絲、蛋絲同埋最重要係有爆得好香嘅蝦米加上一啲蟹籽，令到個味道好豐富，鹹香鹹香，惹味惹味。
