其實等多個幾鐘左右就齊人食晚飯，但同友人又有少少肚餓，又唔敢食多，因為仲要留肚食晚飯，友人就突然建議去飲碗糖水，正呀！又可以頂頂肚，又唔怕飽左食唔到晚飯。
中式糖水都買少見少，特別要好食既真係唔多，友人今次介紹呢間，又幾正喎。
裝修都好簡陋，都幾懷舊，但地方好整潔，呢日大概6點左右，冇咩人，都幾冷清。
睇睇餐牌，嘩，港島區果然較高消費，成$40碗糖水，成日諗，糖水真係好好賺，水黎za Ma!
友人話佢個桑寄生蛋茶好出色！咁我第一次試，就試下呢個啦！
桑寄生雞蛋茶$34。 其實好細碗，但第一啖入口好香，其實我一直唔知到底桑寄生茶係用咩材料煲，但就都好鍾意佢既味，甜度都算識中。重點係隻雞蛋真係好好食！連蛋黃都入味到變左啡色，好似茶葉蛋，但有茶味，但又冇咸味。好得意！平時飲桑寄生蛋茶果隻雞蛋都只係一隻白色雞蛋，冇茶味。但呢隻真係好出色！
蓮子雞蛋芝麻糊$38
友人點左呢款，原因係同時滿足佢三個願望，蓮子、雞蛋、芝麻糊，不過隻雞蛋唔係茶色蛋，係普通一隻熟蛋，令友人失望。不過芝麻糊就都好幼滑好香。
三人埋單共$108。其實真係幾貴，但桑寄生雞蛋茶真係值得一試既！
