朋友仔話想去維園捉精靈～所以就約喺銅鑼灣食飯～
京都廣場一向都多餐廳～樓下一堆叔叔阿姨不斷塞宣傳單俾我哋～但其實我哋早就決定要食日本菜了～
而目的地就係螢壽司～
店仔細細但內裏都幾多和式設計
餐目多到影唔哂
雜錦魚生沙律 （$79）
出街食得多～係時候食返多啲菜～
魚生沙律就可以一次過滿足2個願望！
沙律以柚子醋調味～酸酸的非常開胃～
而菜嘅份量亦不少！
魚生有三文魚、吞拿魚、甜蝦、油甘魚等～都幾新鮮！
雜錦魚生盛 （$168）
魚生沙律唔夠喉～即刻追加個刺身拼盤～
牡丹蝦：肥美無比～蝦嘅甜味突出～附上嘅蝦頭店員話可以生食或加＄煲粥或炸天婦羅～
不過還是鍾意生食嘅鮮味～
三文魚：略嫌脂肪部分不夠多～但魚油味充足
活北寄貝：店員特別提醒平時食開紅紅哋嘅北寄貝係已煮熟～而呢度係活北寄貝～非常鮮甜！而且爽口彈牙～同熟嘅分別好大！
油甘魚腩：非常厚切～𠝹上菱格花亦美觀～口感極佳
劍魚腩：又稱為白玉拖羅嘅劍魚腩比較幼滑～油分充足！
串燒
左：豚肉露筍 （$32）
豚肉切得非常薄～師傅刀功厲害～
露筍亦鮮嫩～有新鮮蔬菜嘅甜味！
右：鹽燒手羽 （$22）
餐廳將雞翼兩支骨分開先拿去燒～
令雞肉受熱平均一點～所以燒得剛剛好
雞皮開始變脆而肉又唔會太老～
鹽燒厚切牛舌 （$48）
叫開串燒當然唔會漏咗牛舌～
比起薄切、更喜歡厚切牛舌嘅啖啖肉
黑椒嘅香氣同牛舌配合良好～
而且燒嘅火喉掌握得好～味道極佳！
大蝦天婦羅 （$48）
好少見到連埋蝦頭炸嘅天婦羅～
剛炸起所以非常熱～
蝦肉新鮮彈牙～炸粉不算太油膩！
蝦頭亦炸得香口～
蒲燒鰻魚朴葉飯 （$108）
朴葉葉質較厚～但香味不及荷葉～
店員介紹鰻魚係先燒好再同飯一齊蒸嘅～
鰻魚因為燒過嘅關係～非常香口～而且鰻魚汁甜度適中～用嚟撈飯一流！
飯係用日本珍珠米～飯味香濃～口感煙韌！
感覺小店用嘅材料好新鮮～尤其刺身最yummy!
日本菜真係日日食都唔會厭的
