台北人, 淨係店名好有親切感。今日行街再經過, 一於買個台式便當, 幾年無去台灣, 真係好掛住台灣的美食。小店地址好易搵, 黃埔站A出口, 一出向右行, 不用2分鐘就到。
小店只供外賣, 裝修走文青系列, 簡約自然。餐牌有8款便當, 小食及台式飲品。
店員友善親切, 我諗緊食邊款台式便當時, 職員主動介紹各款便當。而且充滿笑容健談。最後我揀左 :
台式香腸滷肉飯便當 (附送$15飲品) $65
台式臭豆腐 $38
檸檬冬瓜茶 $25 (便當補回差價 $10)
見到師傅即整便當及台式臭豆腐, 香味濃郁至充滿小店。而且仲有台灣數款零食購買, 好細心。細心位仲有實用外賣袋, 係用不織布袋, 可以循環再用。不錯的意念。
台式香腸滷肉飯便當
整個便當十分豐富, 皆因每個便當會有3款不同配菜, 今日有粉絲, 粟米粒, 椰菜。滷肉十分惹味易入口, 配上滷肉汁配搭一流。粉絲少辣帶香, 佐飯一流。
台式臭豆腐
之前係台灣食過臭豆腐有配菜一齊食, 今次都唔例外, 臭豆腐切到細細粒, 香脆可口, 一口一粒, 配埋椰菜及辣醬, 真係食唔到口呀 !
檸檬冬瓜茶
冬瓜茶係台灣特色飲品, 真係去到必飲, 而且有消暑去濕, 我要檸檬冬瓜茶, 加上檸檬的味道, 令冬瓜茶味道更突出
邊睇台劇邊嘆台式便當, 品嚐台式檸檬冬瓜茶, 真係一大享受
