朋友介紹我去一間性價比超高既馬拉風味餐廳食晏，地點位於鬧市銅鑼灣皇室堡地庫，果然無介紹錯，一看到Menu 是午市套餐，又係我最喜歡的全包宴。每個套餐都已經包括左沙律、甜品及飲品，有部份套餐仲包括埋餐湯，果然正!!
餐廳位置都幾大，座位好多，午市都好快滿座。打開餐牌，哇，單單是午市套餐已經好多選擇，價錢由$58-80不等，當然除左午市套餐餐牌外，仲可以散點。套餐包括的飲品包括咖啡、泰式奶茶、檸檬茶及檸檬水。如果想飲特飲，可以加錢轉，只要分別加$8 或$22 就可以加不同的特飲。
我同同事分別點了 『蟹肉炒飯$76』及 『無骨海南雞喇沙$78』share食。套餐前菜有白雲鳳爪、甜品有意大利芝士蛋糕，而『蟹肉炒飯$76』仲包左中式餐湯。
『無骨海南雞喇沙$78』海南雞每件大大件而且起哂骨，雞件數大約有3-4件，雞件與湯底分開上。喇沙湯底實在令人驚喜，滿充椰子香既湯底，香濃惹味，湯底濃郁，越食越開胃。
『蟹肉炒飯$76』一絲絲既蟹肉放在香濃入味既炒飯上，蟹肉鲜美，雖然,炒飯既顏色看似味道偏淡，但味道恰到好處，而且份量超足，一個人一定吃不完，同人分享就岩岩好喇。
除左點了兩個套餐之外，我地另外點了『地道串燒-雞牛各2串$66』，地道果然是地道菜，唔好以為串燒就真的簡單只有4串就完，其配菜都好豐富，有青瓜、菠蘿、蓄茄仔，仲有已烤過既麵包及兩款不同既醬料，串燒不會烤到好乾，仍然保持到好juicy。
我好想食芒果糯米飯好耐喇，呢個午市套餐只需要加$32就可以食到『椰汁芒果糯米飯$32』有4件，芒果好甜，食埋呢個甜品就真係完滿喇。
差點忘記左介紹我地杯熱拉茶，我地大家都加左$8 轉馬來特色手拉茶，夠熱而且唔太甜，值得加錢轉。
呢間馬來西亞餐廳果然受香港人歡迎，午市人流超旺，人來人往，咁又係，呢度既午市套餐的確好吸引。
