我同朋友都叫咗All Day Breakfast，全日早餐$78超抵食💰！一上枱見到腸、蛋、茹、煙肉，牛角包、薯仔沙律和蔬菜沙律樣樣齊，好豐富😍配搭得非常好，牛角包好香脆，腸好大條，雞蛋煎得啱啱好🍳，少少流心好滑、薯仔沙律正常發揮，不過煙肉略嫌有少少鹹同埋蔬菜沙律有少少太酸，可能醬汁太多。
不過意外發現第一份上枱嘅茹竟然有芝士🧀！（我係超級唔鍾意食芝士嘅😅），但餐牌上完全冇寫有芝士，我落單時都冇講，諗緊算啦，唯有要朋友幫我食咗我嗰份茹佢..😞
講緊之際，店員啱啱聽到我講，即刻主動問我另一份係咪唔好落芝士😍😍，好彩地原來仲有一份未整～真係超貼心🥰，好少見到咁細心留意顧客的需要，真係驚喜咗。
仲加咗個微薑南瓜湯$18 🥣，薑味淡淡、南瓜味香甜但少少稀，不過以呢個價真係無得彈🤩。
另外試咗蟹籽蘆筍煙三文魚香蒜橄欖油意粉$63 🍝，一上枱蒜香撲鼻、擺盤靚✨，加咗少少香蒜所以味道一啲都唔膩～整體食完超滿意。
睇餐牌發現呢間店原來2010年已經有，好食又性價比咁高，點解咁遲先發現🥹🥹下次一定會再嚟❤️！
