御品·千之味 (深水埗) (Closed)

今日突然好想食日本菜，朋友就推介呢間店，佢之前食過覺得食物水準唔錯，於是放工我哋就約埋一齊食啦！ 果然性價比好高，我哋叫咗蟹子沙律，七味雞翼，燒三文魚頭，芝士炸蝦卷同埋黑松露三文魚帶子炒飯。每樣小食就連芝士炸蝦卷都係$50以內，黑松露三文魚帶子炒飯都只係$88，每樣份量都好大，味道又好食，真係好抵食。蟹子沙律- 青瓜好新鮮爽脆，蟹子份量足，沙律醬味道剛好，唔會太酸，撈埋一齊食，每啖都充滿蟹子，好開胃滿足。七味雞翼- 新鮮炸起上枱，熱辣辣，脆卜卜，加上七味粉有少少微辣，好惹味。燒三文魚頭- 有兩大舊，除咗頭仲有尾部位置，好多肉，燒得啱啱好，好香口。芝士炸蝦卷- 面頭鋪滿芝士同蟹子，裏面包住青瓜同炸蝦，炸蝦脆，青瓜爽，飯唔會太多，口感豐富，好正。黑松露三文魚帶子炒飯- 份量真係好足呀，估唔到$88都有咁多黑松露，成個飯都充滿黑松露香味，仲有好多三文魚肉同帶子，好有咬口，味道好夠，好好食。最後店每人都會送粒雪米糍做甜品，值得一讚，好周到。呢餐真係超值，每樣食物都好多，食到我同朋友捧住個肚走，仲有值得一提既係，店裏有兩樽唔同既醬油，一樽係點壽司，一樽係點刺身，可見店鋪既講究認真，一啲都唔馬虎。