DDG Kitchen (Closed)

呢幾年非常之流行嘅花膠雞湯底，喺唔同嘅餐廳都有唔同嘅味道同煮法，有啲餐廳會用麵、有啲餐廳會用飯、有啲餐廳會落藥材、有啲餐廳會煮得比較清淡。

至於東道煮，佢就用米線或者湯飯。米線的確冇乜特別，但係佢嘅其他用料，都冇一樣嘢係唔值得稱讚嘅。首先講吓主角花膠，煮得軟腍入味，用嘅雖然唔係十分之貴嘅花膠，但係都絕對唔係啲煮極都唔腍嘅平嘢。

大配角可以選擇雞或者豚肉，朋友揀咗豚肉，味道都唔錯。我揀咗雞，覺得係明智嘅選擇，因為雞肉嫩滑，完全唔會鞋口。

龍眼肉同埋紅棗都係客串，但係亦絕不馬虎。另外一個客串精選係杞子，用料非常上承，又大粒又飽滿又甜，雖然未至於妹仔大過主人婆，但絕對令一碗好食嘅花膠雞米線錦上添花。