疫情令到大家困係香港咁耐只可以去食唔同地方嘅嘢食慰藉下心靈，我同朋友都好掛住台灣所以揀左食台灣野解下鄉愁☺️作為openrice中毒者嘅我早排loop到呢間餐廳嘅蛋餅完全吸引左我呢個蛋餅控，所以「老厝邊」就係我地今次目標啦😁
呢度分上下兩層，水泥牆配合台灣老風格海報，成件事幾有現代復古感，但疫情關係我地無得現實食只可以買外賣，無得好好享受美食+環境呢個full package了😆😆
我地落單時本身雄心壯志😂但店員姐姐提醒我地份量好大，所以最後order左一個主食兩個小食加野飲，結果就係飽到晚餐都要延後食先消化得到 😂😂
小食方面order左今次最大目標超濃芋泥蛋餅同古早味滷排骨，主食就叫左祕製麻辣三寶麵，飲品就揀左古早味冬瓜茶同蜂蜜檸檬愛玉😃
🍽<超濃芋泥蛋餅/$40>
個人好鍾愛芋泥同蛋餅，有呢個組合嘅野必點，入面餡料係芋泥同芝士嘅搭配，呢度芋泥無加太多額外嘅糖專注番本身嘅原味道，應該為左突出番芋泥嘅味道所以芝士都揀左較淡味嘅做搭配，一啖食落非常滿足☺️蛋餅有跟個台灣醬膏，本身蛋餅比較清淡，點埋醬膏食都唔會太邪惡🤤👍🏻
🍽<古早味滷排骨/$36>
食肉獸另一個小食就揀左排骨😃呢度做法係炸完再加滷汁係上面，犀利之處係無得即刻食都仲做到脆身效果，炸衣好薄身食落無炸物嘅厚重感，滷汁唔太似平時台式滷味嘅味道比較似醬膏個type，但我同朋友都唔太知古早味係指做法定調味，有無人可以留言我地知呢？😆
🍽<秘製麻辣牛三寶麵/$82>
主菜嘅秘製麻辣三寶麵無論味道份量都好驚豔我地🤩🤩三寶有牛肚，牛展，牛筋。其他配料有酸菜紅蘿蔔同蘿蔔，三寶每一款都有三大舊，名符其實嘅「三」寶，每樣材料都好入味，牛肚軟腍牛展嫩滑牛筋腍爽，湯底係好有誠意嘅麻辣，香辣唔死辣亦唔會好似坊間嘅聲稱麻辣但稀淡如水嘅湯底(唔準對號入座啊😆)，麵身方面我地去到可以開餐嘅地方起碼10分鐘後都仲係煙韌有咬口👍🏻
🥤<古早味冬瓜茶/$18>
食完邪惡一系列，我揀左冬瓜茶去消消滯，姐姐有稍為幫我減左甜(全減就無哂味架啦😃) ，飲落幾清爽🤤
🥤<蜂蜜檸檬愛玉/$22>
至於蜂蜜檸檬愛玉飲落有淡淡既蜂蜜甜味，中和番檸檬既酸☺️mix埋酸酸甜甜咁都令我胃口大開🤤夾埋口感Q彈既愛玉一齊飲，口感更加豐富🤤🤤
建議大家食呢間可以外賣番屋企一家人開心share🤤味道同份量相信都會令大家身心滿足👍🏻☺️
