味道樂居酒屋 (河內道) (Closed)

餐廳係懷舊日本風嘅裝修，燈光微暗，俾人一種舒服嘅感覺，幾啱同一兩位朋友嚟食，可以靜靜地傾吓偈。打開餐牌，好多嘢食都好似好吸引咁，特別係啲燒物。最後我哋兩個人叫咗燒物、壽司、炒飯。燒物燒得幾唔錯，面面都係黃金色咁，睇落去就已經有食慾，物量嚟講都係OK嘅，同其他居酒屋差唔多，味道都好味。明太子免治雞肉棒：呢個係我最鍾意食嘅，飽滿嘅雞肉，裡面仲有啲軟骨，咬起嚟爽口，面頭又有啲明太子，每一啖都好享受，哈哈明太子雞翼：呢個雞翼有啲驚喜，因為好飽滿嘅明太子係裡面，而且一咬落去好多汁，鍾意食雞翼真係要一試。流心芝士魚餅：呢樣好大份，食完都覺得有啲小飽，魚餅幾好味，芝士味夠濃。鹽燒雞髀菇：燒完都仲有多汁，好大舊，爽口。鹽燒雞軟骨：燒得好好，唔會硬，爽脆口感。超甜日本迷你蕃薯：真係好甜，好味，軟熟。壽司方面：叫咗黑松露帶子壽司、三文魚火炙壽司、鰻魚火炙壽司，食材都新鮮，火炙得啱好，個人覺得佢壽司可以大件返啲啲。最後有細細碗嘅黑松露和牛炒飯，唔好睇佢細細碗，但係用料幾足，濃郁嘅黑松露味，加上和牛嘅配搭，食起嚟真係好香。